好多香港人都好鍾意日本，但有睇過日劇/返過日資公司嘅應該都知日本嘅職場文化係點，包括無限OT、收工後要應酬、階級觀念極重等，究竟係咪真呢？居港日本Youtuber May就對比香港同日本嘅職場文化，分享6個令她震驚嘅香港工作文化，當中原來香港都有令日本人羨慕嘅地方，大家一齊睇下啦！
1. 廁紙當普通紙巾
第一樣令May非常驚訝嘅就係香港人會將廁紙當係普通紙巾咁用。因為喺日本，廁紙同普通紙巾會分得好清楚，廁紙只會喺廁所度用，見到廁紙亦只會聯想到廁所，所以唔會放喺公司嘅枱上用，普通紙巾就用嚟抺鼻、抺嘴、同抺桌子。但佢第一日喺香港公司返工嗰陣，就見到唔少同事都會將廁紙放喺枱面，令佢非常震驚！
2. 公司冇交通津貼
日本公司大部分都會提供交通津貼畀員工，除非交通費太貴，否則基本返工放工嘅交通費都唔需要員工支付。但嚟到香港返工之後，May發現竟然冇交通津貼。令佢心諗「唔通香港交通費真係平到咁？」。
3. 返到公司先食早餐
依個文化令May覺得好「和平」！因為喺日本係唔可以嘅，如果9：10先返到公司，然後再施施然食早餐，一定會激死上司。喺日本「遲一分鐘都係遲到！」如果大家需要食早餐就要預早時間返到公司。所以May勁讚依個香港獨有職場食早餐文化，「明明遲到都若無其事食早餐，仲要冇比人話！」，希望日本能夠仿效。
4. 去廁所要拎鎖匙
日本廁所可以畀任何人使用，包括便利店、餐廳及公司等嘅廁所都可以任意使用，而香港某啲寫字樓廁所要拎鎖匙先去得，令MAY好好奇係咪保安問題，先有依個文化。
5. 香港有得Sick Leave
原來日本係冇「Sick Leave制度」！喺日本如果因病請假，需要扣有薪假期或扣人工，對於日本人嚟說亦好正常，如果遇到好老闆，就未必要扣人工。而喺香港，每個月都有兩日SL畀員工，只要員工提供醫生紙證明就可享有有薪病假，有啲仲有公司醫療津貼。但原來醫療津貼喺日本並唔常見，所以香港有「sick leave制度」同公司醫療津貼，May表示好鑽意依個安排。
6. 香港拎AL唔會唔好意思
喺日本職場中，「唔放假」係一個好常見嘅現象，通常員工有「想放假」嘅念頭嗰陣，通常最後都會選擇放棄，所以大部份人會「用唔晒啲假期」因為日本人「攞假」時會感到唔好意思，擔心自己請假，會為其他同事帶來麻煩，May指自己試過一年都「無請過假」。所以當May嚟到香港嗰陣，見到同事們放大假真係可以話放就放，完全冇壓力，佢表示好滿意，因為自己從來冇試過咁冇壓力咁拎假。
完整影片：
資料來源：May in Hong Kong
我哋啱啱出咗手機app呀～方便各位IT人搵工，快啲撳下面條link download啦！
Download: https://sickleavetmr.com/web/download-app/
立即Follow我哋，搶先收睇各類文章！
Instagram: https://www.instagram.com/sickleavetmr_official/
Facebook: https://www.facebook.com/sickleavetomorrow/
各位「打工仔」如果想揾工轉工嘅話，就入嚟我地 sickleavetmr.com 啦！我哋有好多好工俾你揀！！
