轉工係人生必經階段,好多人見工時冇做足功課或者臨場表現失準,即使你份CV寫得有幾好、經驗有幾足夠,最後都係「一問便知龍與鳳」!而家即刻教你Interview必問五大難題,預備好點樣拆招,咁見工就萬無一失啦!
1. 你點解會嚟我哋公司應徵呢份工?
呢條係見工必問題目,除咗想知道你對公司嘅了解程度外,仲想畀個機會你Sell吓你自己點解係適合人選。見工前,應該好好了解公司嘅產品、客戶、文化同價值觀等,可以上公司官網或者去新聞網站Search一吓呢間公司嘅近況,再藉此發表你深入分析過嘅見解。然後,講講你具備呢份工作所需要嘅Hard Skills,例如一啲專用電腦軟件。最後,Soft Skills方面,可針對工作特性分享過往事例同經驗。但切記唔好過分Hard Sell,適可而止就好啦。
2. 你點解會離開上一間公司?/你認為舊公司有咩缺點?
呢條問題考驗你嘅個人修養同職業操守。就算你好憎上一份工,都唔可以數臭佢。人哋會怕請咗你之後,當你有日離開呢間公司,會唔會又同其他人唱衰佢哋呢?你嘅答案係反映緊工作態度係「一味埋怨」定係「積極進取」,亦可以知道你嘅思維偏向正面定負面。答嘅時候應該避重就輕,指出舊公司需要改善嘅地方,並簡單提出例子。例如公司喺開發新產品市場上比較保守,但亦令到公司業績較穩定,講明保守並非全無好處。最後可以對Interviewer表達出你希望將來得到啲咩,或者想加入新公司接受未來更多挑戰等,重點係要「對事不對人」。
3. 你覺得我哋公司有咩不足之處?
好多求職者因為唔熟悉應徵公司嘅內部運作,而且要講出不足之處怕會得罪對方,因而覺得好難拿捏分寸。其實呢條問題係想睇你有冇做功課,對公司同行業嘅了解有幾深。事實上,每個行業都有面對緊嘅普遍困難,而每間公司亦有可改善嘅地方。答問題時,可以將重點放喺「點樣做得更好」上面,而唔係數臭公司。特別要記得,表達時要避免用負面字眼,例如「不足」、「唔好」、「做得差」等,改用「可改善嘅地方」會比較穩陣。態度亦緊記要謙虛誠懇,可邀請對方互動補充,可以話:「如果我有咩地方講得唔啱,麻煩你指正一下。」
4. 你有咩優點同缺點?
呢條應該係Interview入面最難答嘅問題,建議可以先講缺點,後講優點,間接美化自己嘅缺點。
缺點方面,切忌講負面嘅人格特質,例如個性懶散、粗心大意、冇記性等等,會即刻大打折扣!反而應該將缺點變成可改善之處,預備定一個實際改善方案去打動Interviewer,如:「我覺得自己英文Oral唔夠好,所以我報讀咗英語課程,並準備報考IELTS。」。又或者,話自己對重要嘅工作太專注,可能會忽略咗一啲較次要嘅事,正嘗試用Schedule清楚列出每項工作嘅進度同Deadline,令自己唔會出現甩漏。
優點方面,切忌過度吹噓自己。最好講一個無傷大雅嘅優點,再表明有進步空間,希望喺新工作中繼續提升自己。建議可以答一個Soft Skill,例如有解決問題嘅能力、說服力或管理技巧等,再講出同應徵職位嘅關聯性,順便Sell吓自己。
5. 你Expected Salary係?
好多人都因為Expected Salary而搞到頭都痕埋,講多咗怕畀人覺得獅子開大口,講少咗又怕會蝕底。其實,應該要留意招聘廣告上面有冇列出人工水平,有嘅話就依照呢個水平,唔好臨時另開價。如果冇列出嘅話,就要做定功課,了解市場薪酬水平,再Set一個願意接受嘅金額。諗好心水價之後,可Set一個略高嘅範圍(通常1K至2K之間)作為走盞位。另外,考慮人工時亦可當成一個全面嘅Package嚟睇,包括雙糧同花紅等公司福利。
想成功入到理想嘅公司工作,獲得理想嘅職位同薪酬,一定要做好事前準備呀!
Follow SICK LEAVE TOMORROW to know more about workplace information!
Instagram: https://bit.ly/3VGJOW5
Facebook: https://bit.ly/3Lk6bf2
Linkedin: https://bit.ly/3Nuo79l
Download SICK LEAVE TOMORROW application:
https://sickleavetmr.com/web/download-app/