職場上除咗會睇你嘅工作能力外，仲好考你嘅人際關係處理技巧，顧問公司TalentSmart創辦人、暢銷書作家Travis Bradberry表示，就算你工作能力好出色，如果你做咗令人討厭嘅行為都會立即喺同事、上司心中留低負面印象。佢指出9樣有可能影響你事途嘅惡劣行為，睇下自己有冇做咗！
必避行為1 : 講大話
做人都應該避免講大話，更何況打工仔呢，就算係善意謊言，只要講咗就會不斷對外傳播，終有一日都會被揭發，到時你想收返都收唔到。另一方面，為咗掩飾自己嘅大話，好多時都要用另一個大話去掩飾。「大話冚大話」會令你好攰，同埋有時會亂到自己都唔記得邊句真，到時就好易穿煲。
必避行為2 : 講是非
講是非係打工仔主要閒聊嘅內容，但鐘意講是非嘅人通常都唔會受人喜歡，另一方面如果你口中嘅流言蜚語傳到當事人耳中，可能會影響到你哋之間嘅關係。如果你每一次都係講啲負面、惡意言論，好易會引起上司不滿，隨時影響自己嘅事業同晉升機會，所以打工仔記得唔好講咁多啦～
必避行為3 : 大聲講自己幾憎份工
任何管理層都唔想聽到有人呻自己有幾憎自己份工，如果你每天上班都呻，身邊嘅同事同上司就會覺得你降低團隊士氣。管理層為咗保持員工士氣，有可能會炒咗你，搵其他更熱情嘅人替代你。如果想保住份工，就唔好放負啦。
必避行為4 : 搶功勞
Travis形容被人搶功勞真係會好嬲，每個人都唔想俾人偷自己idea，如果自己嘅功勞歸人哋，會俾人一種討厭嘅感覺。另一方面，如果你鍾意領功，證明你對自己嘅團體同工作零重視，如果被人揭發，就會失去同事同上司嘅信任。
必避行為5 : 暗箭傷人
如果你成日背後中傷同事嚟達到自己目的，會喺同事同上司眼中有「小人」嘅印象，影響同事關係之餘，仲會阻礙晉升。
必避行為6 : 去得太盡
Travis舉例佢曾經有個客係經營大型連鎖咖啡店，因為舖頭嘅薪酬水平較高，通常咖啡師都唔會因個人原因就無故辭職。但有一次有位咖啡師毫無預兆咁即日話俾經理知佢要辭職，然後即刻離開公司。公司無法即時搵到替代人手，結果係其他員工要頂替佢嘅工作。辭職嘅員工可能認為自己嘅行為只會影響到自己唔鍾意嘅上司，但事實上反而害咗同事們，仲影響自己同每一位同事嘅聯繫。
必避行為7 : 情緒勒索
Travis表示，自己嘅顧問公司成日收到情感勒索嘅個案，包括扔嘢、尖叫、喊等等跡象。佢表示，情緒勒索係一種低情商嘅表現，亦係一種容易被解僱嘅表達方式。一但打工仔表現出情緒唔穩定，上司、同事就會質疑你嘅工作能力，對你有冇能力喺關鍵時刻保持穩定產生質疑，公司自然會諗辦法處理你依個「定時炸彈」。
必避行為8 : 吹噓自己
Travis以打棒球做比喻，當有球員打到全疊打後，並喺跑壘嗰陣開始慶祝，就可以知道佢嘅技術並非好出色；另一方面如果一隊球隊打到全壘打後如常跑壘，證明成功對佢哋嚟講好常見，所以先會用平常心面對。Travis指，完成一件事後唔吹噓自己反而會令身邊嘅人對你更有信心，因為成功對你嚟講唔罕見。
必避行為9 : 食有異味食物
打工仔同樣應盡量避免喺辦公室食有異味嘅食物，任何有臭味嘅食物都可能會分散同事注意力，如果你令到人哋感到不適，更有可能衍生出怨恨。
我哋啱啱出咗手機app呀～方便各位IT人搵工，快啲撳下面條link download啦！
Download: https://sickleavetmr.com/web/download-app/
立即Follow我哋，搶先收睇各類文章！
Instagram: https://www.instagram.com/sickleavetmr_official/
Facebook: https://www.facebook.com/sickleavetomorrow/
各位「打工仔」如果想揾工轉工嘅話，就入嚟我地 sickleavetmr.com 啦！我哋有好多好工俾你揀！！
